आज असोज ८ गतेबाट काठमाडौँको न्युरोड गेटभित्र गाडी लान नपाईने भएको छ । न्युरोड क्षेत्रमा हुने सवारी चापलाई मध्यनजर गरि न्युरोड गेटबाट भित्र प्रवेश गर्ने सम्पुर्ण यात्रुवाहक, मालवाहक तथा निजि चारपाङ्ग्रे सवारी साधनहरुलाई न्युरोड गेटभित्र लान नपाईने ब्यबस्था महानगरीय ट्राफिक प्रहरी परिसरले गरेको हो ।
परिसरका अनुसार आज असोज ८ गतेदेखि फुलपाती सम्म सवारी चाप सामान्य नहुन्जेल सम्म गाडीहरु न्युरोड गेट भित्र लैजान पाइने छैन । गाडी लिएर आउनेहरुलाई ट्राफिक आईसलेण्ड राखिएको स्थानबाट डाईभर्शन गरि खुलामञ्चमा पार्किङ गर्ने व्यबस्था मिलाईएको परिसरले जनाएको छ ।
सो समयसम्म धैर्यधारण गरि ट्राफिक व्यवस्थापनमा सहयोग गरीदिन परिसरले सबैमा आग्रह गरेको छ । उता सर्वसाधारणले यस पटकको दसैँमा पनि धरहरा अवलोकन गर्न नपाउने भएका छन् ।दसैँमा धरहरा खुला गर्ने भनी गत असारमा घोषणा गरिएको थियो ।
केन्द्रीय आयोजना कार्यान्वयन एकाइ (भवन तथा आवास) का प्रमुख कोषनाथ अधिकारीले धरहरा निर्माणको अझै २० प्रतिशत काम बाँकी नै रहेकाले तत्काल सर्वसाधारणका लागि खुला नहुने जानकारी दिए ।धरहरा वरिपरि पूर्वाधार निर्माणका काम भइरहेका छन् । त्यहाँ गहिरा खाल्डा खनिएका छन् ।
निर्माण कार्य भइरहेकाले जोखिम हुने हुँदा तत्काल धरहरा खुला गर्न नसकिएको बताउँदै उहाँले धरहरा कहिलेबाट सर्वसाधारणका लागि खुला गरिनेछ, यसै भन्न नसकिने स्पष्ट गरे।धरहरा छेउमा युटिलिटी ब्लक निर्माण भइरहेको छ । ब्लक निर्माणका लागि खन्दा दूरसञ्चार प्राधिकरणका १८ हजार तार भेटिएका छन् ।
त्यहाँ काम गर्दा एकै पटक १८ हजार टेलिफोन लाइनमा समस्या आउने भएकाले सो ठाउँमा काम अगाडि बढाइएको छैन । त्यस्तै सुन्धारामा पहिलेजस्तै पानीको व्यवस्थापन हुनुपर्ने काम पनि बाँकी छ ।धरहरा क्षेत्रमा आउने पानी र पानी निकासको काम गरेर मात्रै सुन्धारा क्षेत्रतर्फको काम गर्न काठमाडौँ महानगरपालिकाले पत्राचार गरेको छ ।
धरहराको उद्घाटन गत २०७८ साल वैशाखमा गरिएको थियो । तीन अर्ब ४९ करोड रुपियाँको लागतमा धरहराको पुनःनिर्माण हुँदैछ ।एकाइ प्रमुख अधिकारीले धरहरा निर्माणका लागि चौथो पटक म्याद थपिए पनि सो अवधिमा समेत निर्माण सम्पन्न हुन सक्ने अवस्था नरहेको बताए ।
पछिल्लो पटक आगामी पुस मसान्तसम्म म्याद थप गरिएको छ । यसअघि कोभिड–१९ को महामारीको कारण देखाउँदै म्याद थपिएको थियो ।
