क्यानडामा एकजना नेपालीले १ लाख डलरको चिट्ठा जितेका छन् ।
पोखराका दीपक अधिकारीले ‘सिक्स फोर्टी नाइन’ चिट्ठामा एक लाख क्यानेडियन डलर (करिब ९७ लाख रुपैयाँ) पुरस्कार जितेको क्यानडामा रहेका सुनसरी घर भएका नेपाली सञ्चारकर्मी जयराम गौतमले जानकारी दिए ।
दुई वर्षअघि क्यानडा गएका उनले त्यसै बेलादेखि नियमित रूपमा चिट्ठा टिकट किन्ने गरेको बताएका छन् ।
उनले अक्टोबर पहिलो साता ब्रापम्टनको एउटा कन्भिनियन्स स्टोरमा उक्त चिट्ठा किनेका थिए । नेपालमा पर्यटन व्यवसायमा आबद्ध अधिकारीले आगामी दिनमा पनि नियमित टिकट किन्ने पनि बताए ।
